أرسل أحد أصدقائى رسالة تضم استعراضًا لعدد من المنتجات التكنولوجية المبهرة الى لا يحتاجها معظمنا ولن يفكر أبدًا فى مشاهدتها لدى مروره بأكبر معارض الكمبيوتر" إن كانت ستعرض هناك " فضلاً عن شرائها أو محاولة التفكير فى ذلك

وأرسلت إلى هذا الصديق ردًا مهذبًا جاء فيه:

الصراحة نماذج متميزة مع إن أجدع واحد في اللي هيقروا الموضوع ده - اللى هو مش أنا طبعا - عنده تليفون بكاميرا ، واللى ربنا فتح عليه شوية راح جايب لاب توب

مش مشكلة طبعا إننا نشوف آخر الابتكارات الحديثة فى مجال التكنولوجيا ، أهو حتى من باب نفى الجهالة ، وكمان توفر على الواحد البحث والسؤال ، يعنى لو حب واحد يشترى موتوسيكل يجيب على طول أبو عجلة واحدة بدل ما يتعب نفسه ويجيب موتوسيكل من العادى ويروح مغير تانى..على إيه وجع الدماغ

وبعدين هيطلع الفرق كام يعنى ؟؟ مش هيعدى 40 ألف جنيه ...وإيه يعنى ؟؟؟ ولو الشيطان وز حد فينا إنه يغير موبايله يروح من غير ما يفكر يشترى التليفون بتاع نوكيا " تيوب " يعنى هما اللى هيشتروه أجدع مننا ولا إيه؟ وبالنسبة لكل المصريين اللى زى حالاتنا ، رغم إن ممكن واحد مش فاهم يقول إن المنتجات دى ملهاش أى لازمة أو مش بتاعتنا أو الكلام الفارغ ده بتاع الناس الحاقدة اللى مش عاوزة الدنيا تتطور ، إلا إنه أكيد مش هيضر إن واحد يقرا الرسالة بتاعة التكنولوجيا دى أول ما يرجع من فرن العيش بعد ما يقف من الفجر لغاية الساعة 11 علشان يشترى بجنيه واحتمال يرجع من غير ما يعرف يجيب بربع جنيه حتى

وبرضه مفيش مانع خالص الواحد يقعد يمتع نفسه بالمنتجات العصرية دى بعد ما يرجع البيت الساعة 12 ، وهو خارج أصلا من الساعة 7 الصبح بعد ما يخلص شغل فى المكتبين اللى بيشتغل فيهم ليل ونهار علشان يجمع اقساط المدارس وفلوس الجمعية اللى هيروح بيها عمرة هو وأم العيال

وبالتأكيد ليس هناك أى مانع إن الواحد يتعرف على المنتجات المتطورة دى وهو عمال يرمى السى فى بتاعته على 20 مكان علشان يلاقى شغل بعد ما صاحب الشغل استغنى عن خدماته بعد " سوء تفاهم بينهم " وإعطاؤه استمارة 6 " لأن إمكاناته أكبر من طاقة الشغل ، أو حسب مقولة صاحب الشغل للموظف اللى كان داخل يتوسط لصاحبنا " أعلى ما فى خيله يركبه

وأنا طبعا معنديش أى مانع إن الواحد يقعد يتعرف على المنتجات الهايلة دى وهو قاعد على سطح بيته اللى مش عارف يرمى السقف بتاعه علشان يتجوز فيه بعد ما وصل سنه أكثر من 30 سنة ووصل سعر الحديد أكثر من 8 آلاف جنيه

الصراحة يعنى إحنا مش ناقصين استفزاز خالص لأن اللى فينا مكفينا ، بس أهو برضه نتعرف يا جماعة على التكنولوجيا ، هى الفرجة بفلوس ؟ وبعدين يعنى هما اللى هيشتروها أحسن مننا فى إيه ؟ غيرش هى أزمة طارئة " حلوة طارئة دى " بتتعرض ليها البلد " أى نعم هى طولت ييجى 60 سنة بس أكيد هى طارئة برضه " وبعدين كل الشعوب فيها مشاكل "

ومين عالم ؟؟؟ يمكن ربنا يفتح على أى واحد فى اللى هيقروا الموضوع ويقبض جمعية كبيرة ويروح جايب لنا كلنا شماسة مع مشغل dvd " أو "أصغر مسجل فيديو وصوت رقمى" أو حتى "الراديو اللى بيتجسس على الناس" .